家庭、工作、健康

家庭，工作，健康，唔同人對依三樣野嘅比重有唔同嘅想法。對我來講，我嘅比重係咁:

家庭=健康>>>>>>>>>>>工作

我並唔係因為出咗黎做野遇到個無家庭，無健康，只有工作嘅呀姐先至會有咁嘅想法，早响我仲讀緊大學，我己經同自己講家庭同健康永遠都係最先。令到我有依個想法嘅原因主要係因為當年我姑姐因為工作太個操勞，响四十幾歲患上肺癌，好快就過咗身。自依件事後，屋企人成日都提醒我做野唔好咁搏，唔好太操勞，身體要緊。不過好多人會話仲後生，唔搏得幾時? 無錯，人仲後生會有較多精神同魄力去搏，不過換來嘅就係週身的毛病，到年紀漸大，身體已經唔掂檔，大多都會生cancer。搏返黎嘅錢就係用黎幫自己醫病，值得嗎?

家庭係一個無形嘅精神支柱，工作一日後返到屋企都覺得好舒服，雖然係好攰，但見到屋企人，一齊睇電視，食飯，當日嘅煩惱就會得到舒緩。如果無咗家庭，自己一個人返到屋企都只不過係將工作帶返屋企，煩惱得唔到舒緩，仲會因為只得自己一個人越諗越多，永遠都係生活响煩惱當中。

無錯，人係唔可以唔工作，不過我係唔會為咗工作而放棄家庭同健康，大家可以話我懶，只不過工作係永遠做唔完，無咗份工可以搵另一份，而家庭同健康無咗就係無咗，好難搵得返。

大家又點睇呢?

--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)

弦點 ‧ 燃點 The First Strings Appassionato

我同幾個朋友組成嘅strings appassionato响2010年1月2日响牛池灣文娛中心首演，門票現在已烴响城市電腦售票網(urbtix)公開發售。以下係concert嘅海報。



今次係小弟同d朋友第一次自己落手落腳攪一個concert。未攪過都唔知一個concert係有好多好多麻煩嘅行政野要做，就好似要上面張海報成功貼响urbtix都要俾依度approve，俾嗰度cup印，我一個人都要走咗好多轉去個依d野，付出唔少汗水。但係到最後張poster會唔會post出黎都係urbitx d 人決定，有冇人知有依個concert真係唔sure。唉.........

我地真係付出好多心幾同時間去預備依個concert，希望大家多多支持。

--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)

影帝

今日，我做咗影帝，唔係電影個影，而係影印個影。事緣係我要為兩個响2010年3月開始嘅project準備相關文件提交到醫院嘅ethics committee (倫理委員會)審批，依個委員會有十五個人，所以每個project嘅文件要印十五set，一set入面有大約三十五份文件，有d文件有成100張紙，可想而知係有幾多野要影印!!影印完，仲要排好文件次序，打hole，扎好一set 一set，總共係要整30 set!!!

一路整一路諗，其實嗰15個所謂committee都唔知會唔會睇set文件ga la，又大份又多字，同埋approve嘅只會係當中七個committee，即係話只係有七條友係會睇份野，咁洗乜整咁多set??真係老土!!

不過要向好方面諗，下星期頭幾日我都係要full day攪掂依30 set野，唔洗用腦，時間就會過得好快。yeah!!
--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)

台北 (16 - 19 Jul 2009) -- 第四日

唔驚唔覺就到最後一日，依日無乜特別地方去，主力係買手信同揾食。

手信有鳳梨酥，鴨舌等等，都係一d港人必買嘅嘢。

逛吓逛吓，唔驚唔覺就逛到下晝三點，係時候出發去機場。於是就返酒店攞行李，搭飛狗巴士去機場。晚上七點半，我地就離開台北lu..........

--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)

台北 (16 - 19 Jul 2009) -- 第3日

經過兩日嘅市內遊，第3日就係近郊遊。台北市的近郊有好多熱門地點，之前去嘅深坑同淡水都係好例子，不過依兩個地點都可以搭捷運到達，都唔算郊野地區，所以我地就揀咗離台北要一個多鐘頭火車程嘅平溪。

出發去平溪前，先到火車站附近食早餐。跟住本旅遊書揾到一間地踎餃子店，蒸餃好食，大細適中，一啖一隻，不過五十新台幣一籠十隻略貴。之後再到隔離街買遠近馳名嘅福州世祖胡椒餅。胡椒餅，一個字: 正!!!!! 好食到非筆墨所能形容，皮薄餡靚，胡椒味香，肉汁豐富。到台北必食!!!!依個胡椒餅令我地諗起意大利florence嘅牛什包，兩個都好好吃，各有千秋。

食完早餐就返回台北火車站搭十二點火車到瑞芳站，車程大約四十分鐘。到站後再買平溪綫一日週遊票。平溪綫一共有八個站: 瑞芳，侯硐，三貂嶺，大華，十分，望古，嶺腳，平溪，菁桐。憑一日週遊票可以任搭平溪綫。不過，只有菁桐，平溪同十分係出名嘅景點。 估唔到台灣會有好似平溪咁嘅窮鄉僻壤，簡直同台北市係兩個世界，風景又靚。住响依d地方一定好舒服，好悠閒。好想留低住返一頭半個月，不過都只係空想吧。

大概五點幾就撘火車返台北。之後就去永康街食牛肉麵。由最近嘅捷運站行去永康街都要行十五分鐘，所以建議大家打的。永康街附近有好多食店，直頭就係一條食街。咁啱依日係星期六，所以週圍都好多人。條街旁邊仲有個公園仔，有好多當地人响到聚集，成個永康街範圍就好似一個小社區咁，好鬼熱鬧。

雖然好攰，不過因為食咗好多野，我地選擇行返去捷運站撘捷運返酒店。

--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)

台北 (16 - 19 Jul 2009) -- 第2日

第2日嘅行程可以話係非常豐富，同樣，又係食咗好多野。

朝早八點幾起身，第一個景點係國父紀念館，台北必去景點。館中展品大多都係複製品，因為真身都係响大陸。入面有個孫中山銅像，size同華盛頓嘅林肯像差唔多。

之後唔記得咗咩原因去咗台北車站附近嘅三越，响入面食咗台灣潤餅。潤餅係地道食物，一塊白色薄餅包住有甜味嘅豬肉同好多好多棷菜絲同炸菜絲，有d似黐飯，都好飽肚。

由台北車站行，穿過二二八公園，就到總統府。屬到此一遊景點。响凱達格蘭大道影幾幅相就夠。再由總統府行去中正紀念堂。早排陳水扁將個名改做台灣民主紀念館，我地有幸响依個名前影咗幅相，因為過幾日，即係七月二十日，個名就改番做中正紀念堂。

咁啱rita幾個親戚又响台北旅行，我地就相約响鼎泰豐食lunch。好多人，要等位。但係個人覺得食物無乜驚喜，唔明白點解咁多人去食。我自己prefer去旅行食d"地踎"嘅野食。

食完lunch，大家就各自各行，相約夜晚响淡水再見。我地先返酒店放低d多餘野，之後諗住搭巴土去圓山飯店，點知個酒店bell boy點咗我地搭架唔停圓山嘅巴士，只係响附近經過!! 最後停响士林官邸附近，就決定去睇吓。士林官邸係蔣介石以前住嘅地方，入面有個好大嘅花園同玫瑰園，不過正值盛夏，無玫瑰花睇。

天母市係一個比較特別嘅市鎮，因為市內有間日本國際學校，所以好多日本人，d內街同d屋嘅格局都好日本，行入去就好似去咗日本咁。我地跟住本旅遊書揾到一間和菓子店，老闆係日本人，賣嘅和菓子係老闆每日親手做，好新鮮。我地買咗旅遊書介紹嘅其中兩款和菓子，點知老闆娘睇一睇我地本旅遊書就送埋其他有介紹嘅和菓子俾我地，總共四款，真好人。之後揾到一間刨冰餐廳，食咗一個地瓜黑糖刨冰，我地行到身水身汗，食個刨冰真係透心涼啦!! 响刨冰餐廳附近就係三越百貨，有免費shuttle bus 到芝山捷運站，我地就由芝山站出發去淡水。

淡水，一個沿海市鎮，有d似鯉魚門，不過唔係淨係有海鮮食，而係有唔同嘅街邊小食。响淡水捷運站匯合rita親戚之後，就開始掃街之行。食咗燒原隻魷魚，燒鵪鶉蛋，馳名魚旦，"阿給"，炸鮮奶，燒蠔，燒翡翠螺，仲有四件和菓子。當然無錯過到淡水嘅夕陽靚景。食到半飽，就周圍行吓，捷運站附近有條shopping街，好多鋪頭，五光十色。行完已經九點幾，但係點可以俾個口停??一於向士林夜市出發。

到達士林夜市附近嘅劍潭捷運站，見到條街迫滿人，燈火通明，就知道無去錯地方。先到臨時室內夜市，就好似香港嘅熟食中心，先食豪大大雞扒，再食炒花枝。之後去戶外夜市，人山人海，水洩不通，有賣衫，賣鞋，應有盡有。走到入去就唔會知道方向，就好似入咗叧一個世界咁。响戶外夜市食咗雪花冰同飲咗檸檬愛玉。行到十一點半，又好飽，就撘捷運返酒店。士林夜市真係一個令人好excited嘅地方。

待續..........

--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)

台北 (16 - 19 Jul 2009) -- 第1日

今次的台北之旅沒有工作成份，純粹同rita旅遊散心。之前未去過台灣，但係都知道去台灣唔可以唔做嘅事就係食，所以一直都好期待今次嘅旅行。

第一日晨咁早五點幾就起身出發去機場，因為要搭8:15am班機。無錯，係8:15am，因為要爭取多d响台北嘅時間。去台北只需要一個多鐘頭嘅機程，大約9:45am就到達，不過之後攪落地簽證同過移民局就用咗頗多時間，再加埋搭四十五分鐘機場巴士，最後大約十二點先至到酒店。settle down之後第一件事就係揾食，睇住本旅遊書，就揾到一間响酒店附近一間叫古鼎嘅小籠包店，依間野係由一位之前响鼎泰豐嘅廚師開嘅，小籠包好食，油豆腐粉絲湯好食過香港嗰d多多聲。我地剩係叫咗兩樣野，食得唔飽，因為要留肚之後再食。

之後就去台北動物園睇熊貓團團同圓圓。有趣嘅係熊貓响台灣係叫"貓熊"，真係令人費解，背後應該有d政治姿態响度。其實個動物園都幾大，行哂都用咗兩個鐘。

睇完動物就搭巴士去深坑。深坑位於台北近郊，所以沒有台北市的繁忙。深坑有條街叫深坑老街，成條街都賣馳名臭豆腐，仲有賣麻薯菓子。我地响其中一街邊檔買咗串臭豆腐，其實臭就唔係好臭，個醬有d咸，不過整體都算唔錯。另外跟住本旅遊書去咗一間叫古早厝嘅鋪頭食麻辣鴨血豆腐同醬燘筍，燘筍非常好味，值得推介。

深坑之後，就去台北101。此仍到此一遊景點，影完相就算。附近嘅new york new york，三越百貨同誠品都係shopping同睇書地方，除誠品外，逗留時間不長。

大概九點到達西門町，好多人，同北京黃府井不相伯仲。响西門町食咗阿宗麵綫，蚵仔煎，特長雪糕，可樂餅同飲咗楊桃冰，已經好飽啦。之後週圍逛吓，不過d鋪頭十點幾就close，無乜好野睇。累了，就返酒店。

待續.........
--------------------------------------------------------
“I pay no attention whatever to anybody's praise or blame. I simply follow my own feelings.” --- W. A. Mozart (1756 - 1791)

“[T]o talk well and eloquently is a very great art, but that an equally great one is to know the right moment to stop.” --- W. A. Mozart (1756 - 1791)